♥ 夏日島 ♪ Sommarøy ♥

年齡過咗半半百，唔可以再申請韓國政府嘅獎學金。

咁計劃變一變，去韓國讀咗語學堂先。

預算有限加上各各種嘅原因，今次就決定咗去高麗大學語學堂。

多數分享申請手續嘅都係台灣嘅朋友仔，所以身爲港女嘅我要分享下香港嘅申請情況 !! ♥

2019年秋季課程7月31號 deadline。

雖然一般大家都係deadline前一個月先申請，但係緊張大師如我5月中已經開始填form ( 但係其實工作太忙，最終其他申請文件都係6月初先申請。哈哈哈哈 )

因爲申請程序仲未完，timeline遲啲再update，而家分享下點樣準備各樣文件先~~

 

我一次過申請秋季同冬季兩個學期，需要嘅文件以下。(注意文件需要以英文或者韓文書寫)

• 填好嘅入學申請書一份 
• 學歷證明正本 (畢業證書正本)
• 財力證明 (戶口結餘證明書正本)
• 空白期證明文件 (e.g. certificate of employment)
• 護照副本一份
• 相片 2 張 (3.5 x 4.5 cm)

其實我建議大家睇英文版本，各類文件嘅中文名實在太多元化，喺各大銀行網頁做資料收集真係頭都暈...

而且流傳用英文同高麗大溝通會比用中文快，不過我就冇用中文send過email。傳聞真與假就不得而知喇~

 

好 !! 正式開始回憶一次準備過程 !! ♥ 

 

♪ 學歷證明 ♪

根據高麗大學嘅資料，已經畢業嘅各位要提供最終就讀學校嘅畢業證書正本；在學嘅各位就要提供在學證明書 (年老嘅我表示：哈哈哈) 

我讀嗰間大學嘅網頁話：No duplicate copy will be issued.

因爲遺失同損壞導致需要補領亦都要 800 蚊 (亦唔係全年任何時間都拎得) !!

於是，我向學校申請咗 1) 學歷證明書 (certifying letter) 同 2) 畢業證書嘅 certified true copy (經學校核證爲真實嘅一份副本)。

前者要價 $50，等大約5個工作天；後者就 $40，即時拎得。但係詳細嘅申請情況同費用就要睇翻各大院校嘅網頁喇~

最終我兩樣文件都交曬畀高麗大學。而學校最後只係話我嘅文件all accepted，冇講邊樣係多餘嘅。

不過我估計 certified true copy 應該會係好啲嘅選擇~ 畢竟佢係一張證書嘅copy嘛 ♥

 

♪ 財力證明 ♪

再回想都覺得呢份文件令我頭大...

首先，申請兩個或以上嘅學期的話，學校網頁嘅指引話你戶口需要有 10,000 美金，學校職員email俾我嘅資料話要 9000 美金。

我當時係跟咗 9000 美金去開證明書嘅。

不過大家如果有足夠閒錢，跟 10,000 美金都絕對冇壞嘅~~

 

準備好錢，就要去銀行排隊喇... (等等等...)

最初我見高麗大網頁中文版寫嘅係 “銀行存款證明書”，所以我 (懶醒) 一開始去銀行係講要申請 “存款證明”。

但係可能因爲銀行有提供幾種嘅存款證明，職員都再三又再三確認我係咪肯定要申請要錢個張。

職員們嘅善意瞬間令我覺得自己生得太似一隻迷途小羔羊 哈哈哈哈哈 !!!

Anyway, 我翻屋企再三查證之後，係用英文版 “bank certificate of deposit balance" 成功同職員申請到我需要嘅存款證明㗎 !!

一講...佢哋就知我要咩...

 

好，咁到底bank certificate of deposit balance嘅真身係咩呢 ? 我check咗我用開嘅一啲銀行嘅收費：

• 渣打：戶口結餘證明書 (certificate of balances) - $150
• 恆生：簽發結餘證明書 (certificate of account balance) - $100 (2019年7月1日起)
• 中銀：證明賬戶結餘 (confirmation of account balance) - $100

最後我係喺渣打申請嘅，因爲我屋企樓下冇恆生，中銀又永遠都咁多人...

如果你都想喺渣打申請證明書，要記得幾件事~

• 證明書列出嘅會係前一個工作天戶口嘅結餘。所以星期一申請嘅話，星期六要將啲錢存好入戶口。
• 我去嗰間細分行承諾 2-3 個工作天做到俾我，最後2日已經 ready for collection♥。 但係尖沙咀嘅分行就話要2個星期先有...大家唔想等咁耐嘅，可能就要問多兩間喇~ 

 

♪ 空白期證明文件 ♪

如果大家畢業超過一年先報讀高麗大學語學堂，就要準備certficate of employment, 證明呢一年內你喺某某機構由幾時到幾時工作緊。而年過半半百嘅我當然需要啦。

亦都要留意，文件唔係即刻就有㗎。

 

♪ 相片 2 張 ♪

我偷懶冇剪細我已經有嘅證件相...(噓) 但係最後好彩都過到審核。嘻嘻，多謝。

 

♪ 申請時間表 ♪

• 02 - 13/06：預備申請文件
• 14/06 (五)，中午：DHL 速遞哥哥上門收文件
• 17/06 (一)，早上：高麗大學語學堂 office 簽收
• 20/06 (四)，下晝：收到高麗大學語學堂 office 叫我交學費嘅 email
• 24/06 (一)：中銀匯款失敗...(哭)
• 25/06 (二)：恆生成功發出匯款
• 27/06 (四)：學校確認收到匯款 (噢耶 !!)

冇錯，大家冇睇錯，我匯咗兩次款先成功。所以跟住落嚟就同大家整理一下我喺香港匯款去韓國嘅經驗，減低大家失敗嘅機率啦~ ♥

 

♪ 匯款 ♪

確定收齊申請文件之後，學校會叫你用 wire transfer 交報名費加學費。

Wire transfer 其實就係 telegraphic transfer，又即係電匯。手續費如下：

• 渣打：電匯費 $250 (最低消費) + 非主流貨幣附加費 $200  = $450 (分行)  [而我實際詢問過嘅價格係：更貴 @@]
• 恆生：$220 (分行)；$65 (online banking)
• 中銀：$210 (分行)；$65 (online banking)

 

既然網上匯款去海外嘅手續費比起去分行平 3 倍，我好心動咁走咗去試下~

但係我點都見唔到南韓圜 (KRW) 呢種貨幣俾我選擇 !!

原因原來係：喺香港嘅金融體制之下，南韓圜 (KRW) 係非主流貨幣~ 所以我哋匯款係並唔可以直接匯won嘅。

於是乎，我再一次去咗中銀排隊...而經過兩個鐘頭嘅漫長等待同溝通，等到嘅係職員話：要有學校嘅商業登記號碼 (BR) 先做到匯款...天啊 !!!! 晴天霹靂...

不過 !! 我唔覺得學校會比少啲咁重要嘅資訊我，畢竟我唔會係史上第一個過高麗大學讀語學堂嘅香港人吖嘛~

所以我第二日去咗恆生再試：當我只係將個匯款 email 俾職員抄低資料 >> 確定匯款嘅金額 >> 簽個名，就輕鬆完成咗手續嘅時候，我嘅心情係幾咁激動呢 !!! ♥♥♥

過程中職員有解釋俾我聽佢係用港幣匯錢過去韓國嘅銀行，等對方喺韓國將啲錢換成 won (所以email入面都有提到："Hana Bank will charge you KRW 7,000 for transferring foreign currency")

換句話講，大家需要自行換算你嘅學費等於幾多港幣。(哎...好難...)

我嘅情況係：

兩期學費 + 報名費

= (1,660,000 x 2) + 60,000

= KRW 3,380,000

但係一來我哋唔知對方銀行匯率係幾多，二來唔肯定佢哋有冇其他嘅手續費。所以向上攞個整數，稍爲匯多咗少少。

點知 27/6 學校確認收到我嘅匯款嗰陣，我真係匯多咗。

令人開心嘅消息係：多咗係有得退嘅。而且有錢收翻嘅感覺好美好，好似有 discount 咁~~ 哈哈哈哈哈 ♥

 

跟住落嚟，就係等語學堂寄 admission letter 俾我去整 D-4 visa 喇~ (緊張緊張)