♥ 夏日島 ♪ Sommarøy ♥

未嚟韓國之前已經聽講 9 月係開學季節，會好多學生搶考試院。於是出發之前就已經訂咗一間喺新村嘅考試院。

不過住咗差唔多一個月，我已經忍唔住揀咗咗去江南嘅高級考試院，準備螞蟻搬家搬過去。

江南考試院未有詳細嘅心得同感受分享俾大家，所以呢篇 blog 就同大家分享下我住新村呢間考試院嘅感受先~

但係介紹個別考試院之前，我覺得有需要大大力咁提一提醒大家：其實一般考試院嘅房間本人都生得大同小異，所以其實最重要嘅係大家要考慮清楚自己到底接唔接受到呢一類嘅住宿，大致上...即係一啲空間頗細、隔音頗差嘅共享空間。

簡單嚟講，一切都在於個人感受。

如果發現接受唔到，大家就可以及早開始搵其他嘅住宿類型，慳返寶貴嘅時間啦~ 畢竟搬屋真係好攰... 如果考慮過係接受到，至少唔抗拒嘅呢，就可以 move on to the following steps：

• 按照自己對房間大小 / 環境衛生 / 裝修 / 附加服務等等呢啲方面嘅要求去搵適合自己嘅考試院。
• 睇屋 ( 非常重要!! )

當然，隨住條件嘅提升，價錢一般都會越貴啦。一分錢一分貨嘛。 

好，咁而家就介紹下新村呢間考試院對我個人嚟講嘅優點缺點，俾大家做個參考啦。

♪ 位置 ♪

新村地鐵站 8 號出口，往弘大方向步行大約 5 分鐘距離

♪ 月租 ♪

55 萬 won；包水/電/地暖/上網，另設入住清潔費 3 萬 won ( 退回：No ) 同鎖匙按金 2 萬 won ( 退回：Yes )

♪ 優點 ♪

• 獨立冷氣機
• 獨立地暖
• 獨立洗衣機 ( 註：冇乾衣功能 )
• 獨立洗手間 ( 註：非乾濕分離 )
• 整棟建築物都係考試院嘅範圍 ( 地下大門同每一層樓都有密碼鎖 )
• 免費提供白飯，泡菜，雞蛋

重要嘅一點~~ 房東同房東媽媽都好友善同樂於助人 !! ♥♥

證據一：簽約嘅時候我間房嘅冷氣不斷發出噪音，其實我全心全意聽緊 + 講緊韓文，根本冇留意到，但係房東主動發現咗呢個問題，亦都主動幫我安排維修。

證據二：我間房嘅雪櫃唔知點解完全唔 work 嘅。房東都喺個幾星期之內幫我換咗個新嘅雪櫃。♥♥

所以，雖然我最後決定搬走，但係唔代表呢間考試院真係好有問題。

再次強調嘅：一切都係個人感受。

我一開始都諗，大家都係咁住，冇理由我唔可以嘅。以前都係咁樣住宿舍㗎喇，以前冇獨立廁所添啦。

但係感覺就真係感覺，大家要誠實面對，勉強冇幸福啊 !!

講咁多，最終都係要分享下我個人接受唔到嘅點。

等大家嘗試感受一下自己接唔接受到。

♪ 不足之處 ♪

☼ 週邊環境 ☼

其實新村生活機能非常唔錯。有適合年輕人嘅餐廳、行街嘅地方、超市、銀行、cafe 等等。呢點真係令我唔係好捨得搬離開新村。

而且 8 號出口附近亦都冇好多啲咩嘈雜嘅酒吧同餐廳。

只係，少人所構成嘅靜、或者四周出入嘅人俾我嘅感覺，對我個人嚟講都係一種考量。

☼ 房間清潔 ☼

上面提到入住清潔費要俾 3 萬 won，但係我覺得有啲唔抵...

因爲搬入嚟嘅時候我周圍都抹過一次，發現仍然好多拮手嘅沙粒/塵粒。

冷氣機下面嘅位置 (瞓喺床嘅時候會望到嘅地方) 亦都有頗多嘅塵 (?) 

冇錯，其實係唔影響我嘅生活，最多就自己出手抹...

只係...我總係感覺唔係幾開心 ( 要錢的呢 T_T )

☼ 洗手間 ☼

呢個部分係最終令我下定決心要走嘅位。

第一，處理垃圾嘅問題。

喺首爾，好多地方都唔俾你將廁紙掉落馬桶。即係話，你大小二便用完嘅廁紙都要掉落垃圾筒，再自己拎去掉...

房東係有提供垃圾筒嘅，但係係冇蓋嘅，所以各位最好自己買一個有蓋嘅垃圾桶... 

第二，熱水供應問題。

我間房沖涼嘅熱水供應非常唔穩定。水一時熱到好似就嚟燙傷咁，一時就太凍...

我想像唔到點樣喺度度過冬天...

第三，氣味問題。

唔知係因為樓齡定其他原因，儘管我長期冚埋個馬桶蓋，廁所長期都會有頗強嘅渠味...

☼ 廚房 ☼

呢樣真係要睇吓大家好唔好運...我覺得我就唔係幾好運，遇到啲稍為冇咁整潔嘅同層...

因爲資源回收垃圾筒其實係 G/F，房東亦都係𨋢入面貼好咗告示叫大家做好回收。

所以我諗呢啲垃圾應該大家要自己負責處理好佢 ?? 嗯...

仲有另外一次，甜味爆發嘅養生飲品漏到一地都係...

點解唔自己清潔翻呢...??

但係我本住好快搬走 + 最多我餐餐都 eat out 嘅心情，我就冇同房東反映過呢個問題。

免得營造麻煩人嘅形象，影響代訂人同自己嘅聲譽 ( 因爲只係我自己個人層面無法接受 )。

但係如果大家打算長住，又唔好彩遇到呢啲同層，我覺得真係可以向房東友善地反映問題。

畢竟大家都係住客，大家都有權利享受一個整潔嘅生活環境㗎嘛。但係謹記要有禮貌 !!

好，分享到呢度。希望大家對於自己嘅接受程度有多一點點嘅了解。

遲啲再同大家分享江南考試院嘅入住心得 !!